बारामती आणि दौंड परिसरात जोरदार अवकाळी पावसाने हजेरी लावली असून, याचा फटका स्थानिक वाहतुकीवर मोठ्या प्रमाणात बसला आहे. दौंड शहरालगत असणाऱ्या पवार पॅलेस येथील रेल्वेच्या पुलाखाली मोठ्या प्रमाणावर पाणी साचल्यामुळे दौंडहून नगरकडे जाणारी वाहतूक पूर्णतः ठप्प झाली आहे. या भागात आज दिवसभरात झालेल्या मुसळधार पावसामुळे रेल्वे पुलाखालील रस्त्यावर चक्क जलसाठा निर्माण झाला आहे. परिणामी वाहनांची व स्थानिक नागरिकांची मोठी गैरसोय होत आहे.

काही ठिकाणी वाहनांची हालचाल मंदावली असून, वाहतूक अडथळ्यांना सामोरे जावे लागत आहे. स्थानिक प्रशासनाला या परिस्थितीची माहिती देण्यात आली असून, जलनिकालासाठी तात्काळ उपाययोजना करण्याचे आदेश देण्यात आले आहेत. स्थानिक नागरिक आणि वाहनचालकांनी सुरक्षिततेच्या दृष्टिकोनातून या मार्गाचा वापर टाळण्याचे आवाहन करण्यात येत आहे.