भारतीय शेती नवतंत्रज्ञानामूळे कात टाकून पाहतीये. अकोला जिल्ह्यात तंत्रज्ञानस्नेही शेतकऱ्याने पेरणीचा नवा प्रयोग केला आहे. अकोल्यातील राजू वरोकार आणि त्यांच्या कुटूंबियांनी ‘जीपीएस कनेक्ट’ या सॉफ्टवेअरच्या माध्यमातून विनाचालक ट्रॅक्टरद्वारे सोयाबीन आणि तुरीची पेरणी केली आहे. जर्मन तंत्रज्ञानाचा महाराष्ट्रात पहिल्यांदाच वापर होत असल्याचा दावा वरोकार कुटूंबियांनी केला आहे. या तंत्रज्ञानाच्या माध्यमातून एका रेषेत सरळ पेरणी होते. या तंत्रज्ञानात शेतात ट्रॅक्टरद्वारे पेरणी करण्यासाठी चालकाची गरज लागत नाही. पेरणी अगदी सरळ होते. यासाठी जर्मन तंत्रज्ञानाचे 'आर्टीके' उपकरण लावण्यात आले आहे. हे उपकरण शेताच्या एका बाजूला ठेवावे लागते. ‘जीपीएस कनेक्ट’द्वारे ते उपकरण ट्रॅक्टरशी जोडले जाते.