विदर्भातल्या काँग्रेस नेत्यांचा वाद आता दिल्लीत पोहोचला आहे. चंद्रपूरच्या खासदार प्रतिभा धानोरकर आणि विरोधीपक्ष नेते विजय वडेट्टीवार यांच्यातील वादाच्या पार्श्वभूमीवरती दोन्ही नेत्यांना दिल्लीला बोलावण्यात आलं आहे. विधानसभा निवडणुकीपूर्वीच या वादावर तोडगा काढण्याचा पक्षश्रेष्ठींचा प्रयत्न आहे.

विदर्भातले नेते खासदार प्रतिभा धानोरकर आणि विरोधीपक्ष नेते विजय वडेट्टीवार यांच्यातील वादावर काँग्रेसचे वरिष्ठ नेते बैठक घेणार असल्याचं समजत आहे. काँग्रेसचे संघटक सरचिटणीस के. सी. वेणुगोपाल, राज्य प्रभारी रमेश चेन्नीथला यांच्यासोबत ही बैठक होणार आहे, अशी माहिती सूत्रांनी दिली आहे. त्यामुळे आता धानोरकर विरुद्ध वडेट्टीवार हा मिटणार का ? यावर काही तोडगा निघणार का? यावर सगळ्यांचे लक्ष लागले आहे. दरम्यान, काँग्रेस नेते माजी मुख्यमंत्री पृथ्वीराज चव्हाण यांनी या प्रकरणावर प्रतिक्रिया देताना, ''निवडणुकीच्या तोंडावर अशा बैठका होत असतात'' असं म्हंटल आहे.