भूषण अहिरे, धुळे | साम टीव्ही

Dhule Shinde Sena internal factionalism : शिवसेना शिंदे गटाचे नेते आणि मंत्री उदय सामंत यांच्यासमोरच पक्षातील अंतर्गत गटबाजी उफाळून आली. त्यावर स्वतः सामंत यांनी संबंधित पदाधिकाऱ्यांचे कान टोचले. धुळ्यातील पक्षांतर्गत गटबाजी रोखण्यासाठी नवीन प्रयोग करणार असल्याचं ते म्हणाले.

कार्यक्रमाच्या ठिकाणी बॅनर लावण्यात आले होते. त्या बॅनरवर जिल्हाध्यक्षांचा फोटोच नव्हता. यामुळं पक्षातील अंतर्गत गटबाजी चव्हाट्यावर आली. त्याची गंभीर दखल मंत्री उदय सामंत यांनी घेतली. उपमुख्यमंत्री एकनाथ शिंदे यांच्याशी बोलून धुळ्यात नवीन प्रयोग राबवणार असल्याचे ते म्हणाले. संपूर्ण महाराष्ट्रात फक्त धुळ्यामध्येच शिवसेनेत गटबाजी असल्याची खंत सामंत यांनी व्यक्त केली.

सामंत यांनी शिवसेनेच्या पदाधिकारी आणि कार्यकर्त्यांसोबत झालेल्या आढावा बैठकीत संबंधितांना चांगलीच तंबी दिली. अंतर्गत गटबाजी करणाऱ्यांना शेवटची संधी असेल. त्यानंतर जर अंतर्गत गटबाजी दिसून आली तर, त्यांना पदावरून हटवण्यात येईल, असा इशाराही त्यांनी संबंधित पदाधिकाऱ्यांना दिला.