मंत्री धनंजय मुंडे यांच्यासाठी त्यांचा मुलगा सीशिव आता मैदानात उतरला आहे. माझे वडील सर्वोत्तम नसले तरी ते वाईट देखील नाही आहेत, असं सीशिवने म्हटलं आहे. सीशिवची ही पोस्ट सोशल मिडियावर चांगलीच व्हायरल झाली आहे. सीशिव हा करुणा शर्मा आणि धनंजय मुंडे यांचा मुलगा आहे. तर आई छळाचा दावा करत आहे, मात्र तिने आमचा छळ केला असल्याचा दावा देखील सीशिवने या पोस्टमधून केला आहे.

मंत्री धनंजय मुंडे यांना काल वांद्रेच्या कौटुंबिक न्यायालयाने करुणा शर्मा यांना देखभालीसाठी २ लाख रुपये देण्याचे आदेश दिलेले आहेत. करुणा शर्मा यांनी मुंडे यांच्या विरोधात छळाची तक्रार दाखल केलेली होती. त्यावर कोर्टाने हा निर्णय दिला आहे. त्यानंतर एकीकडे धनंजय मुंडे यांच्या अडचणी वाढण्याची शक्यता असतानाच दुसरीकडे मात्र धनंजय मुंडे यांचा मुलगा त्यांच्यासाठी मैदानात उतरलेला बघायला मिळत आहे. करुणा शर्मा आणि धनंजय मुंडे यांचा मुलगा सीशिव याने सोशल मिडियावर एक पोस्ट केली आहे. त्यात त्याने म्हटलं आहे की, वडील सर्वोत्तम नसले तरी आमच्या आईएवढे ते वाईट नाही. वडील आईसोबत कठोर असले तरी आमच्यासोबत ते कठोर नाही. आई छळाचा दावा करते, तसाच छळ तिने देखील आमचा केला आहे. मी, माझी बहीण आणि वडील धनंजय मुंडे यांचा आई करुणा हीने छळ केला, असाही दावा सीशिवने या पोस्टमधून केला आहे. आमच्या कौटुंबिक समस्येला मनोरंजनाचं साधन बनवलं जातं आहे. २०२० पासून वडील आमची काळजी घेत आहेत.

दरम्यान, सीशिवच्या सोशल मिडियावर ही केवळ एकच पोस्ट असल्याने याबद्दल नेटकऱ्यांकडून शंका उपस्थित केली जात आहे.