मनसेच्या गुढीपाडवा मेळाव्या नंतर मनसैनिक मराठीच्या मुद्यावरून पुन्हा एकदा आक्रमक झाली आहे. यंदाच्या मनसे मेळाव्यात राज ठाकरे यांनी पुन्हा एकदा मराठीच्या मुद्याला हात घालत मुंबईतील सर्व बँकांमध्ये मराठीचा वापर होत आहे का नाही याची चौकशी करावी असे आदेश मनसे कार्यकर्त्यांना दिले होते. त्यानंतर मनसे मुंबईतील बँकांमध्ये जाऊन राडा करताना दिसली. अनेक अधिकाऱ्यांना मनसैनिकांनी चोप दिल्याचा प्रकार देखील पाहायला मिळाला. यावरच बँकांच्या अधिकाऱ्यांनी आम्हाला संरक्षण द्या अशी मागणी मुख्यमंत्र्यांकडे केली होती.

या प्रकरणावर आज मुख्यमंत्री देवेंद्र फडणवीस यांनी प्रतिक्रिया दिली आहे. महाराष्ट्रात मराठीचा आग्रह करणं चुकीचं नाही तो आग्रह कुणीही करू शकतं. मात्र, हा आग्रह करताना कायदा हाती घेणं चुकीचं आहे. जर कोणी कायदा हातात घेतला तर कडक कारवाई केली जाईल असा इशारा देवेंद्र फडणवीस यांनी मनसेला दिला.