राज्याचे कौशल्यविकास मंत्री मंगलप्रभात लोढा यांनी एक खळबळजनक वक्तव्य केले आहे. ते शुक्रवारी एका आयोजित कार्यक्रमात बोलत होते. तसेच त्यांनी यावेळी मुंबईच्या महापौरपदी भाजपतर्फे दावा ठोकला. लोढा म्हणाले, आपण देवाभाऊंची विविध रूपं पाहतोय. त्यांची 100 वेगवेगळी रूपं आहेत. देवेंद्र फडणवीस यांनी अनेक कामे केली आहेत. ते नागपूरचे सर्वात तरुण महापौर झाले. भाजप देवाभाऊमय तर आहेच. मात्र, राज्यातील इतर पक्ष कसे चालतील, हे देखील देवाभाऊच ठरवतात. मी गेल्या 25 वर्षांपासून बघतोय. राजकारण करण्याचे काम त्यांना कधी आवडते तर कधी नाही. मात्र, आपल्या कुटुंबातील सुखदुखात ते लगेच तत्पर असतात आणि अडचणी आल्या तर धावून येतात, असे मंत्री मंगलप्रभात लोढा यांनी सांगितले.