प्रॉपर्टी टॅक्स (मालमत्ता कर) थकवणाऱ्या दीनानाथ मंगेशकर रुग्णालयावर दंडात्मक कारवाई करण्यात यावी, यासाठी पुणे महापालिका उपायुक्त (मिळकत कर विभाग) यांना महाराष्ट्र प्रदेश युवक काँग्रेसच्या वतीने निवेदन देण्यात येणार आहे. दीनानाथ मंगेशकर रुग्णालयाने गेल्या ६ वर्षांपासून तब्बल २७ कोटी ३८ लाख ६२ हजार ८७४ रुपयांचा प्रॉपर्टी टॅक्स भरला नसल्याचे समोर आले आहे.

२०१९ पासून रुग्णालयानं मालमत्ता कर थकवला आहे. सामान्य नागरिकानं मालमत्ता कर थकवला तर एकीकडे पुणे महानगरपालिका प्रचंड त्रास देते. दंडात्मक आणि जप्तीची कारवाई देखील केली जाते. मात्र दीनानाथ मंगेशकर रुग्णालयावर मेहरबानीची भूमिका महापालिकेने घेतल्याचे दिसत आहे, असा आरोप युवक काँग्रेसने केला आहे. त्या विरोधात युवक काँग्रेस महापालिकेला निवेदन देणार आहे. जर महापालिकेने आज हॉस्पिटलला टाळे ठोकले नाही तर आम्ही ठिय्या आंदोलन करू, असा इशारा युवक काँग्रेसकडून देण्यात आला.