सोलापूर-हैदराबाद महामार्गावर मुळेगाव तांडा परिसरात आज सकाळी भीषण अपघात झाला. भरधाव वेगात असलेल्या कंटेनरने दुभाजक तोडत विरुद्ध दिशेने येणाऱ्या ऍसिड टँकरला जबर धडक दिली. या भीषण अपघातात टँकरचालकाचा मृत्यू झाला असून अन्य दोन जण गंभीर जखमी झाले आहेत.

धडकेनंतर टँकरमधून नायट्रिक ऍसिडची गळती सुरु झाली. त्यामुळे परिसरात तीव्र दुर्गंधी पसरली असून नागरिकांना श्वास घेण्यास त्रास होऊ लागल्याने घबराट उडाली. घटनेची माहिती मिळताच अग्निशमन दल आणि पोलीस घटनास्थळी दाखल झाले असून परिस्थिती नियंत्रणात आणण्याचे प्रयत्न सुरू आहेत.

अपघातामुळे महामार्गावरील वाहतूक काही काळासाठी ठप्प झाली होती. जखमींना तात्काळ रुग्णालयात दाखल करण्यात आले असून अधिक तपास सुरु आहे.