राज्यात मराठी आणि हिन्दी भाषेवरून वाद सुरू आहे. यावरून राजकारण देखील चांगलेच तापले आहे अशातच आज शिक्षणमंत्री दादा भुसे यांनी पत्रकार परिषद घेत भाष्य केले आहे. आमच्या आदेशात हिंदी अनिवार्य असा कुठेही उल्लेख नाही, असं सांगत त्यांनी याबाबतच्या गैरसमजांना पूर्णविराम दिला आहे. दादा भुसे म्हणाले, इतरही माध्यमांच्या शाळांमध्ये मराठी भाषा शिकवणं बंधनकारक आहे.

राज्याची मातृभाषा असलेली मराठी सर्व विद्यार्थ्यांनी शिकावी, ही आमची भूमिका आहे. त्याचबरोबर, 1ली ते 5वीच्या विद्यार्थ्यांसाठी त्यांच्या इच्छेनुसार अन्य भाषाही शिकवता येतील, असा निर्णय देखील घेण्यात आला आहे. विद्यार्थ्यांनी मागणी केलेल्या भाषांचे वर्ग सुरू करण्याचा प्रयत्न केला जाणार आहे. भुसे पुढे म्हणाले, एका शाळेत किमान 20 विद्यार्थी एखादी भाषा शिकण्याची मागणी करतील, तर त्यांच्यासाठी शिक्षक उपलब्ध करून देण्यात येतील.