लोकसभेतील विरोधी पक्षनेते राहुल गांधी यांच्या आरक्षणसंदर्भातील वक्तव्यावरून सध्या वाद सुरू आहेत. या पार्श्वभूमीवर राहुल गांधी यांच्यावर शिंदे गटाचे संजय गायकवाड तसेच आता भाजपचे खासदार डॉ. अनिल बोंडे यांनी वादग्रस्त टीका केली आहे. यावर आता काँग्रेस प्रदेशाध्यक्ष नाना पटोले यांच्यासह काँग्रेस नेत्या यशोमती ठाकूर यांनी प्रत्युत्तर दिले आहे. यामुळे आता काँग्रेसने आक्रमक भूमिका घेतलेली दिसत आहे. अनिल बोंडे यांच्या घराबाहेर काँग्रेसने आंदोलन देखील सुरू केले आहे. उद्या राज्यभरात काँग्रेसकडून जोडे मारो आंदोलन देखील करण्यात येणार आहे.

काँग्रेसने घेतलेल्या आक्रमक पवित्र्यामुळे अनिल बोंडे यांच्या घराबाहेर सुरक्षा व्यवस्था वाढवण्यात आली आहे. काँग्रेसच्या कार्यकर्त्यांनी एकत्र जमत अनिल बोंडे यांच्या फोटोला जोडे मारून निषेध केला आहे. त्यांच्या घरासमोर मोठ्या प्रमाणात काँग्रेसचे कार्यकर्ते जमा झालेले आहेत. राहुल गांधी यांच्यावर केलेल्या टिकेनंतर आता बोंडे यांच्यावर काँग्रेसच्या मागणीनंतर गुन्हा दाखल करण्यात आला आहे. गुरुवारी काँग्रेसचे कार्यकर्ते राज्यभरात हे जोडे मारो आंदोलन करणार आहेत.