कॉंग्रेसकडून 5 उमेदवारांची नावं निश्चित झाली असल्याची माहिती सूत्रांकडून देण्यात आली आहे. राज्यात विधानसभा निवडणुकीच बीगुल वाजलेलं आहे. 20 नोव्हेंबरला मतदान होणार असून आता सगळे पक्ष उमेदवार निवडीसाठी चाचपणी करायला लागलेले आहेत. महाविकास आघाडीचा जागा वाटपाचा तिढा अद्यापही पूर्णपणे सुटलेला नसताना आता कॉंग्रेसकडून पुणे शहरातील 5 उमेदवारांची नावं विधानसभा निवडणुकीसाठी निश्चित करण्यात आली असल्याचं सूत्रांकडून सांगण्यात आलं आहे. यात रवींद्र धंगेकर, रमेश बागवे आणि दत्ता बहिरट यांना उमेदवारी मिळणार असल्याचं बोललं जात आहे. याचबरोबर भोर आणि पुरंदरमधील देखील नावं ठरली असल्याचं सांगण्यात आलं आहे. यात संग्राम थोपटे आणि संजय जगताप यांच्या नावावर शिक्करमोर्तब झालं आहे. रवींद्र धंगेकर यांना कसबामधून उमेदवारी मिळू शकते. तर रमेश बागवे यांना खडकी कॉन्टेनमेंट आणि दत्ता बहिरट यांना शिवाजीनगर मधून उमेदवारी मिळण्याची शक्यता आहे. या नावांची अधिकृत घोषणा अद्याप व्हायची आहे.