गेल्या वर्षभरापासून ज्याची आतुरतेने वाट पाहिली जात होती त्या गणरायाचे आज राज्यभरात मोठ्या उत्साहात आणि धूमधडाक्यात आगमन झाले. बाप्पाच्या आगमनाने संपूर्ण महाराष्ट्रात नवचैतन्याचे वातावरण निर्माण झाले असून सर्वत्र मंगलमय उत्सवाचे स्वर उमटले आहेत.

दरम्यान, राज्याचे मुख्यमंत्री देवेंद्र फडणवीस यांच्या शासकीय निवासस्थान ‘वर्षा’ येथेही लाडक्या बाप्पाचे आगमन झाले. फडणवीस यांनी सहकुटुंब गणपती बाप्पाची विधिवत पूजा केली. यावेळी त्यांनी राज्यातील जनतेच्या कल्याणासाठी प्रार्थना केली. राज्यात सुख-समृद्धी नांदो, सर्वांचे विघ्न दूर होवोत, अशी मनोकामना फडणवीस यांनी गणरायाकडे व्यक्त केली. गणेशोत्सवाच्या प्रारंभीच भक्तिभावाने आणि उत्साहाने वातावरण भारावून गेले आहे.