पुणे शहरात ढगफुटीसदृश्य पाऊस झाला आहे. मुसळधार पावसामुळे नद्या-नाले तुडूंब भरून वाहत असून अनेकांच्या घरात पाणी शिरलंय. खडकवासला धरणातून विसर्ग मोठ्या प्रमाणावर झाल्यानंतर शहरांमध्ये अनेक ठिकाणी पाणी जमा झालं आहे. 14 वर्षानंतर प्रथमच नारायण पेठेत पाणी शिरलं आहे. स्थानिक प्रशासनाकडून कुठलेही लक्ष नसल्याचा आरोप नागरिकांकडून केला जातोय.

एकता नगर आणि शिवाजीनगर परिसरातील अनेकांच्या घरात पावसाचं पाणी शिरल्याने नागरिकांचे हाल होत आहे. हिंगणे खुर्द, साई नगर येथे डोंगरमाथ्यावरुन मोठ्या प्रमाणात पाणी येत असल्याने अनेक घरांमध्ये पाणीच पाणी झालं आहे. वडगाव शेरी, आनंदनगर बसस्टॉप येथे एका वाहनावर झाड कोसळंय.

सुदैवाने वाहनात असलेली शाळेची मुले व वाहनचालक सुरक्षित आहेत. पावसामुळे पुण्यातील सर्व शाळा महाविद्यालयांना आज सुट्टी जाहीर करण्यात आली आहे. पुणे शहर व जिल्ह्यातील अतिवृष्टीच्या पार्श्वभूमीवर उपमुख्यमंत्री अजित पवार यांनी परिस्थितीचा आढावा घेतला आहे. जिल्हा प्रशासन आणि आपत्ती निवारण यंत्रणेला बचाव व मदत कार्यासाठी सतर्क राहण्याचे आवाहन करण्यात आलंय.