अभिजीत सोनावणे, नाशिक | साम टीव्ही

ग्रामपंचायतीच्या बैठकीत विविध समस्या, मुद्द्यांवरून बाचाबाची, किरकोळ वाद होत असतात. पण नाशिकच्या गोवर्धन ग्रामपंचायतीत झालेल्या ग्रामसभेत सदस्यांमध्ये तुफान हाणामारी झाली आहे. ग्रामसभा सुरू असतानाच हा राडा झाला. त्यामुळं एकच गोंधळ उडाला होता.

नाशिकमध्ये गोवर्धन ग्रामपंचयतीत ही घटना घडली. ग्रामपंचायत सदस्यांमध्ये ग्रामसभा सुरू असतानाच आधी बाचाबाची आणि नंतर त्याचं पर्यावसन हाणामारीत झालं. विषय मंजुरीवरून हा वाद वाढला आणि तुंबळ हाणामारी झाली, असं सांगितलं जात आहे.

रिपोर्टनुसार, गोवर्धन ग्रामपंचायतीनं काल, बुधवारी ग्रामसभा बोलावली होती. त्यात गावातील काही कामांच्या विषयांना मंजुरी देणे, त्यानुसार काही विषय मंजुरीला घ्यायचे होते. त्यासंदर्भात चर्चा सुरू असतानाच विषय मंजुरीवरून अचानक दोन गट आमनेसामने आले. त्यांच्यात बाचाबाचीनंतर तुंबळ हाणामारी झाली. विषय मंजुरीच्या मुद्द्यावरून हा राडा झाला. नाशिक तालुका पोलीस ठाण्यात तक्रार आणि गुन्हा नोंदवण्याची प्रक्रिया सुरू आहे.