देशभरात NEET पेपरफुटीवरुन वातावरण चांगलेच तापले असून दिल्लीच्या जंतर मंतरवर CJP चे जोरदार आंदोलन सुरू आहे. आज लोकसभेच्या पावसाळी अधिवेशनाचा पहिलाच दिवस असल्याने हा तरुणाईचा मोर्चा लोकसभेवर निघाल्याने पोलिसांनी या आंदोलकांवर लाठीचार्ज देखील केला. यामध्ये अनेक विद्यार्थी हे जखमी झाले आहे. मात्र जो पर्यंत शिक्षणमंत्री धर्मेंद्र प्रधान हे राजीनामा देत नाही तो पर्यंत हे आंदोलन सुरूच राहील असा ठाम निर्धार कॉक्रोच जनता पार्टीने केला आहे.

एकीकडे या दिल्लीमध्ये हे आंदोलन सुरू असताना आता याचे पडसाद देशाच्या आर्थिक राजधानी म्हणजेच मुंबई मध्ये देखील पाहायला मिळाले. दादरच्या चैत्यभूमीमध्ये देखील तरूणांनी आंदोलनाला सुरुवात केली होती. मात्र पोलिसांनी या सगळ्या आंदोलकांना ताब्यात घेतले. याठिकाणी मोठ्या प्रमाणात पोलिसांचा फौजफाटा दाखल झाला असून पोलीस आणि कॉक्रोच जनता पार्टीच्या तरुणांना पोलीस व्हॅनमध्ये टाकले. आंदोलकांकडून सरकारविरोधात जोरदार घोषणाबाजी देण्यात आली.