सीआयडीचं पथक आता बीडमध्ये दाखल झाल्याची माहिती समोर आली आहे. सीआयडी पथकाचे प्रमुख सचिन पाटील बीड शहर पोलीस ठाण्यामध्ये दाखल झाले आहेत. त्यामुळे माजी सरपंच संतोष देशमुख हत्या प्रकरणाच्या तपासाला गती मिळाली असल्याचं बघायला मिळत आहे. मात्र वाल्मिक कराड यांचं काय हा सवाल अद्यापही कायम आहे. कारण सीआयडीकडून त्यांच्या अटकेच्या माहितीला कोणताही दुजोरा देण्यात आलेला नाही.

बीडच्या केजमधील मस्साजोगचे माजी सरपंच संतोष देशमुख यांचे अपहरण आणि हत्या प्रकरणी आता तपासाला वेग आला आहे. 20 दिवस उलटूनही आरोपींना अद्याप अटक झालेली नसल्याने राजकीय वर्तुळातून आणि बीड जिल्ह्यातील नागरिकांकडून पोलीस प्रशासनाच्या कारवाईवर नाराजी व्यक्त केली जात होती. त्यानंतर देवेंद्र फडणवीस यांनी स्पेशल एसआयटी नेमण्याचे आदेश दिल्यानंतर आता कालपासून या प्रकरणाच्या तपासाला वेग आला आहे. आज सीआयडीचं पथक बीडमध्ये झालं आहे. सीआयडी पथकाचे प्रमुख सचिन पाटील बीड शहर पोलीस ठाण्यामध्ये दाखल झाले आहेत. त्यानंतर सीआयडी पथकाने एका महिलेला चौकशीसाठी बोलावलं आहे. मात्र ती महिला कोण यावर अद्याप काही माहिती समोर आली नाही. त्यासोबतच सीआयडीच्या पथकांनी आणखी काही वस्तू देखील ताब्यात घेतल्या आहेत.