नाशिकमध्ये चांदवड येथील पेट्रोल पंप चौफुलीवर रस्ता ओलांडत असलेल्या तीन महिलांना पाठीमागून आलेल्या अवजड ट्रकने चिरडल्याने एक महिला ठार आणि दोन गंभीर जखमी झाल्या आहेत. हा अपघात सीसीटीव्हीत कैद झाला असून, परिसरात एकच खळबळ उडाली आहे.मृत महिला गुणमाला श्रीपाद पहाडे (वय 65, रा. सोयगाव, मालेगाव) यांचा घटनास्थळीच मृत्यू झाला. तर सुशीला श्रीपालचंद पहाडे आणि अनिता विनोद पहाडे या दोन महिला गंभीर जखमी असून, त्यांच्यावर उपचार सुरू आहेत.

या तिन्ही महिला लासलगावमधील नातेवाईकांकडील कार्यक्रम आटोपून मालेगावकडे जात होत्या. चांदवड बसस्थानकावर मालेगावकडे जाणारी बस नसल्याने त्यांनी रस्ता ओलांडून महामार्गावरून बस पकडण्याचा प्रयत्न केला. त्याच वेळी ट्रक (क्रमांक MH 19 CY 9313) मालेगावच्या दिशेने जात असताना त्याने या महिलांना चिरडले.या भागात बससेवा थेट बसस्थानकावर न येता महामार्गावरूनच चालते, त्यामुळे प्रवाशांना विशेषतः महिला व वृद्धांना मोठ्या अडचणींना सामोरे जावे लागते. त्यामुळे बसस्थानकावरूनच थेट बससेवा सुरु करण्याची मागणी नागरिकांतून होत आहे.