यापुढे ९ कॅरेटच्या सोन्यासाठी देखील हॉलमार्किंग बंधनकारक करण्याचा विचार भारत सरकार करत आहे. यासंदर्भात लवकरच घोषणा करण्यात येणार आहे.

अलीकडे सोन्याचे भाव गगनाला भिडलेले आहेत. त्यामुळे कमी कॅरेटच्या सोन्याच्या मागणीत वाढ झाली आहे. ९ कॅरेट, १४ कॅरेट आणि १८ कॅरेटच्या सोन्याचा यात प्रामुख्याने समावेश आहे. त्यामुळेच आता ९ कॅरेटच्या सोन्यावरही हॉलमार्किंग लावण्याचा विचार भारत सरकारकडून केला जात आहे. याबाबत भारतीय मानक ब्युरोनं संबंधित हितधारकांशी चर्चा सुरू केली आहे.

आगामी सणासुदीचा काळ आणि लग्नसाराईचा हंगाम बघता सोन्याची मागणी मोठ्या प्रमाणात वाढण्याची शक्यता आहे. त्यातच सतत वाढत जाणाऱ्या सोन्याच्या किमतीमुळे आता ९ कॅरेट सोने खरेदी करण्याकडे देशातल्या नागरिकांचा कल वाढला आहे. अशातच वाढत्या चोरीच्या घटना बघता या ९ कॅरेट सोन्यावरही लवकरच हॉलमार्क तथा शुद्धतेचे प्रमाणपत्र दिले जाणार आहे.