मुंबई विद्यापीठातल्या सिनेट निवडणुकीत सर्व 10 जागांवर विजय मिळवल्यानंतर ठाकरे गट युवा सेनेकडून मातोश्रीवर जल्लोष करण्यात येत आहे. 10 पैकी 10 जागांवर ठाकरे गटाने अखिल भारतीय विद्यार्थी परिषदेला पराभूत केलं आहे. त्यानंतर शनिवारी मातोश्रीवर आनंदोत्सव साजरा करण्यात येत आहे. यावेळी उद्धव ठाकरे, आदित्य ठाकरे, तेजस ठाकरे, वरुण सरदेसाई यांनी गुलाल उधळत जल्लोष केला आहे. यावेळी आदित्य आणि तेजस या दोन्ही भावंडांनी एकमेकांना गुलाल लाऊन भावुक होत मिठी मारलेली दिसून आली. तर वरुण सरदेसाई यांनी बॅन्डच्या तालावर ठेका धरत आपला आनंद व्यक्त केला. त्यामुळे विधानसभेआधीच मातोश्रीवर उधळले गेलेल्या या गुलालाने कार्यकर्त्यांत उत्साहाचं वातावरण बघायला मिळालं आहे.

मुंबई विद्यापीठाच्या सिनेट निवडणुकांचा निकाल शुक्रवारी जाहीर झाला. मुंबई विद्यापीठांच्या १० नोंदणीकृत १० पदवीधारांच्या जागांकरिता मंगळवारी २४ सप्टेंबर मतदान पार पडलं होतं. या निवडणुकीत दहाही जागांवर ठाकरे गटाच्या युवासेनेने विजय मिळवला आहे.