शिंदे गटाचे आमदार अब्दुल सत्तार यांच्या अडचणीत वाढ होऊ शकते. सिल्लोड विधानसभा मतदारसंघात महायुतीने अब्दुल सत्तार यांना उमेदवारी दिली आहे. सत्तार यांनी उमेदवारी अर्ज दाखल करताना दिलेल्या शपथपत्रात मालमत्तेची माहिती लपविल्याची तक्रार सामाजिक कार्यकर्ते महेश शंकरलाल शंकरपेल्ली व डॉ. अभिषेक हरिदास यांनी निवडणूक अधिकारी लतीफ पठाण यांच्याकडे केली आहे. तसेच निवडणूक आयोगाच्या अधिकृत पोर्टलवर देखील ऑनलाइन तक्रार दाखल केली आहे. तक्रारीत त्यांनी म्हटले आहे की, अब्दुल सत्तार यांनी शपथपत्रामध्ये खोटी, भ्रामक व दिशाभूल करणारी माहिती नमूद केली आहे. शपथपत्रात खोटी माहिती नमूद करणे प्रचलित कायद्यानुसार बेकायदेशीर आहे. त्यामुळं सत्तार यांचा उमेदवारी अर्ज रद्द करावा, अशी मागणी करण्यात आलीय.