महायुती सरकार स्थापन झाल्यानंतर राज्याचा पहिला अर्थसंकल्प आज उपमुख्यमंत्री आणि अर्थमंत्री अजित पवार यांनी सादर केला. या अर्थसंकल्पाकडे संपूर्ण राज्याचे लक्ष होते. विविध क्षेत्रांसाठी अनेक घोषणा करण्यात आल्या असल्या तरी घर खरेदीसंदर्भातील वाढीव शुल्कामुळे नागरिकांच्या खिशाला कात्री लागणार आहे.

घर खरेदी करताना लागणारी स्टॅम्प ड्यूटी वाढणार असल्याचे अर्थसंकल्प सादर करताना अजित पवार यांनी स्पष्ट केले. अधिनियम कलम 4 नुसार एका व्यवहारासाठी एकापेक्षा अधिक दस्तऐवजांचा वापर केल्यास पूरक दस्तऐवजांसाठी स्टॅम्प ड्यूटी 100 रुपयांवरून 500 रुपये करण्यात आली आहे. तसेच महाराष्ट्र मुद्रांक अधिनियमातील कलम 31(1)नुसार दस्तऐवजांच्या स्टॅम्प ड्यूटी अभिनिर्णय प्रक्रियेसाठीचे शुल्क 100 रुपयांवरून 1,000 रुपये करण्यात आले आहे.

या निर्णयामुळे घर खरेदी करताना नागरिकांना मोठा आर्थिक भार सहन करावा लागणार असून सर्वसामान्यांना घर घेणे अधिक महाग होणार आहे.