ठाण्यातील लुईसवाडी परिसरात उपमुख्यमंत्री एकनाथ शिंदे यांच्या बंगल्याबाहेर शुक्रवारी मध्यरात्री एक धक्कादायक घटना घडली. त्यांच्या सुरक्षेसाठी तैनात असलेल्या पोलीस एस्कॉर्ट वाहनाला अचानक आग लागली. या घटनेमुळे परिसरात काही काळ गोंधळाचे वातावरण निर्माण झाले. मिळालेल्या माहितीनुसार, शिंदे यांच्या बंगल्याबाहेर पोलिसांची अनेक वाहने रांगेत उभी होती. त्यापैकी एका वाहनातून अचानक धूर येऊ लागला. काही क्षणांतच या धुराचे रूपांतर आगीत झाले. ही घटना लक्षात येताच तेथे उपस्थित असलेल्या पोलीस कर्मचाऱ्यांनी तातडीने आग विझवण्याचा प्रयत्न केला.

घटनेची माहिती मिळताच अग्निशमन दलाला बोलावण्यात आले. अग्निशमन दलाचे जवान घटनास्थळी दाखल झाले आणि त्यांनी आग आटोक्यात आणण्यासाठी प्रयत्न सुरू केले. यावेळी रस्त्यावर उपस्थित असलेल्या काही नागरिकांनीही बादल्यांमधून पाणी टाकून आग विझवण्यास मदत केली. या घटनेची माहिती मिळताच वरिष्ठ पोलीस अधिकारी घटनास्थळी पोहोचले. दरम्यान, वाहनाला आग लागण्यामागचे नेमके कारण अद्याप समोर आलेले नाही. तसेच या घटनेत कोणतीही जीवितहानी झाली आहे का, याबाबत अधिकृत माहिती मिळालेली नाही. या घटनेमुळे परिसरात काही काळ खळबळ उडाली होती.