स्टँडअप कॉमेडीयन कुणाल कामराने काही दिवसांपूर्वी उपमुख्यमंत्री एकनाथ शिंदे यांच्यावर आपल्या गाण्यातून खोचक टीका केली होती. यानंतर राज्यातील राजकारण चांगलेच तापल्याचे दिसून आले होते. कामराच्या विरोधात शिंदेसनेने विविध पोलीस स्थानकात गुन्हे दाखल करत त्याच्यावर कारवाईची मागणी केली होती. तसेच त्याचा शो ज्या स्टुडिओमध्ये झाला त्याची तोडफोड देखील केली होती.

कुणाल कामराने आपल्या अटकेच्या विरोधात तामिळनाडू कोर्टात धाव घेत अटकेपासून सुरक्षा मिळवली होती. या संपूर्ण प्रकरणाची सुनावणी आज मुंबई कोर्टात पार पडली असून त्याला अटक न करण्याचे आदेश मुंबई हायकोर्टाने दिले आहे. मात्र, गुन्हा रद्द करण्याच्या याचिकेचा निकाल कोर्टाने राखुन ठेवला आहे. कामरा मुंबईत आल्यावर त्याच्या सुरक्षेच काय? त्याची सुरक्षा कशी करणार? असे प्रश्न हायकोर्टाने विचारले आहे.