वायकरांच्या खासदारकीला आव्हान देणारी शिवसेना ठाकरे गटाचे उमेदवार अमोल कीर्तिकर यांची याचिका मुंबई उच्च न्यायालयाने फेटाळली आहे. मतमोजणीत फेरफार करून रवींद्र वायकर यांना विजयी घोषित करण्यात आलं, असा कीर्तिकर यांचा आरोप होता.

मुंबई उत्तर पश्चिमचे शिंदे गटाचे खासदार रवींद्र वायकर यांना मुंबई उच्च न्यायालयाचा मोठा दिलासा मिळाला आहे. वायकरांच्या खासदारकीला आव्हान देणारी शिवसेना ठाकरे गटाचे उमेदवार अमोल कीर्तीकर यांची निवडणूक याचिका मुंबई उच्च न्यायालयाने फेटाळली आहे. मतमोजणीत फेरफार करून वायकर यांना विजयी घोषित करण्यात आल्याचा कीर्तिकर यांचा आरोप होता. आज न्यायमूर्ती संदीप मारणे यांच्या एकलपीठाने या याचिकेवर निर्णय दिला आहे. मुंबई उत्तर-पश्चिम लोकसभा मतदारसंघाच्या मतमोजणी अमोल किर्तीकर EVM मतमोजणीत एका मताने आघाडीवर होते. मात्र पोस्टल मतमोजणीत ४८ मतांनी वायकर यांचा विजय झाला. यात वायकर यांना ४ लाख ५२ हजार ६४४ मते, तर किर्तीकर यांना ४ लाख ५२ हजार ५९६ मते मिळाली.