ओंकार कदम, सातारा

साताऱ्यातील म्हसवड नगरपालिका निवडणूक भाजपसाठी अत्यंत प्रतिष्ठेची झाली होती. प्रचाराच्या काळात दिग्गज नेते तिथं ठाण मांडून बसले होते. एकट्या भाजपविरोधात तीन प्रमुख पक्ष एकवटले होते. अजित पवार यांची राष्ट्रवादी आणि शरद पवार यांचा राष्ट्रवादी काँग्रेस पक्ष, तसेच रासप हे तीन पक्ष भाजपविरोधात रणांगणात होते. साम टीव्ही महाएक्झिट पोलनुसार, साताऱ्याच्या म्हसवड पालिकेवर भाजपची सत्ता येण्याची शक्यता आहे. तर भाजपच्या नगराध्यपदाच्या उमेदवार पूजा विरकर या निवडून येतील असा अंदाज वर्तवण्यात आला आहे.

म्हसवड पालिकेवर भाजपची सत्ता येण्याची शक्यता असून, ११ नगरसेवक निवडून येण्याचा अंदाज व्यक्त करण्यात आला आहे. या पालिकेत एकूण २० सदस्यसंख्या आहे. तर नगराध्यक्ष जनतेतून निवडून द्यायचा होता. नगराध्यक्षपदाच्या शर्यतीत भाजपच्या विरकर आणि दोन्ही राष्ट्रवादी-रासप या तीन पक्षांकडून राजमाने या रिंगणात होत्या. पण अखेर भाजपच्या विरकर या बाजी मारताना दिसतात. आता प्रत्यक्ष निकालानंतरच संपूर्ण चित्र स्पष्ट होईल.