राज्याचा मुख्यमंत्री कोण याचा पेच अखेर सुटला असून भाजपकडून देवेंद्र फडणवीस यांचं नाव राज्याचे भावी मुख्यमंत्री म्हणून घोषित करण्यात आलं आहे. आज पार पडलेल्या भाजप आमदारांच्या कोअर कमिटीच्या बैठकीत एकमताने हा निर्णय घेण्यात आला आहे. महाराष्ट्र विधानसभा निवडणुकीच्या निकालानंतर 11 दिवसांनी अखेर सत्तास्थापनेचा दावा भाजपने केला आहे. यावेळी भाजपच्या गटनेतेपदी देखील देवेंद्र फडणवीस यांची निवड करण्यात आली. विधीमंडळ पक्षाचा नेता निवडीसाठी भाजपचे केंद्रीय निरीक्षक विजय रुपाणी आणि निर्मला सीतारामन उपस्थित होत्या. मुख्यमंत्री म्हणून देवेंद्र फडणवीस यांच्या नावाची घोषणा होताच भाजप कार्यकर्त्यांकडून ठिकठिकाणी जल्लोष करण्यात आला. नागपुरात भाजप कार्यालयाबाहेर पदाधिकारी कार्यकर्त्यांनी देवेंद्र फडणवीस यांच्या नावाची मुख्यमंत्री म्हणून घोषणा होताच फटाके फोडून गुलाल उधळत एकच जल्लोष केला.

दरम्यान, उद्या देवेंद्र फडणवीस हे मुख्यमंत्री म्हणून सायंकाळी 5 वाजता मुंबईच्या आझाद मैदानावर नव्या सरकारचा शपथविधीत शपथ घेतील.

Edited By Rakhi Rajput