भूषण अहिरे, धुळे

महापालिका निवडणुकांमध्ये उमेदवारी न दिल्यानं सर्वाधिक नाराजी उफाळलेल्या भाजपनं बंडोबांना शांत केल्याचं चित्र आहे. कल्याण-डोंबिवली, पनवेल, नवी मुंबईसह अनेक ठिकाणी उमेदवार बिनविरोध निवडून येत असतानाच, अर्ज माघारीच्या अखेरच्या दिवशी धुळ्यातही भाजपनं बिनविरोध निवडीचा चौकार ठोकला आहे.

उमेदवारी अर्ज माघारी घेण्याच्या शेवटच्या दिवशी भाजपच्या गोटात मोठ्या हालचालींना वेग आला आहे, आज पुन्हा एकदा अर्ज माघारीच्या अखेरच्या दिवशी चौथा उमेदवार देखील बिनविरोध निवडून आला आहे. प्रभाग क्रमांक 17 अ मधील भाजपचे उमेदवार अमोल मासुळे हे बिनविरोध निवडून आले आहेत.

शिवसेना शिंदे गटाच्या उमेदवारासह अपक्ष उमेदवारांनी माघार घेतल्याने अमोल मासुळे यांचा विजयाचा मार्ग मोकळा झाला. शिवसेना शिंदे गटाच्या अधिकृत उमेदवाराने आपला उमेदवार अर्ज माघारी घेत थेट भाजपत प्रवेश केला. भाजपच्या आतापर्यंत एकूण चार जागा बिनविरोध निवडून आल्या आहेत. आणखी किती नगरसेवक बिनविरोध निवडून येणार, याकडे सर्वांचे लक्ष लागून राहिले आहे.