बिग बॉस मराठी सीजन 5 चा विजेता सूरज चव्हाण आज उपमुख्यमंत्री अजित पवार यांच्या भेटीला गेला. यावेळी त्याने अजितदादांना आपली बिग बॉसची ट्रॉफी देखील दाखवली. अजितदादांनी देखील अतिशय कुतुहलाने या ट्रॉफीला न्याहाळले. या भेटीवेळी पार्थ पवार आणि राष्ट्रवादी कॉंग्रेस अजित पवार गटाचे पदाधिकारी देखील उपस्थित होते.

छोट्या पडद्यावरील लोकप्रिय कार्यक्रम बिग बॉसची ओळख आहे. या कार्यक्रमाचा पाचवा सीजन नुकताच संपला आहे. बारामतीच्या अत्यंत छोट्या गावातला सूरज चव्हाण हा यंदाच्या सीजनचा मानकरी ठरला आहे. त्यातच आता बिग बॉस मराठीच्या पाचव्या पर्वाचा विजेता सूरज चव्हाणने उपमुख्यमंत्री अजित पवारांची भेट घेतली. अजित पवारांचे पुण्यातील जिजाऊ निवासस्थानी सूरज चव्हाण आणि अजित पवार यांची भेट झाली. अजितदादांनी यावेळी सूरजसोबत गप्पा मारल्या. त्याचे कुटुंब, भविष्यातील प्लॅन्स याबद्दलही अजितदादांनी चौकशी केली आहे. यावेळी सुरजने सोबत आणलेली ट्रॉफी अजितदादांनी कौतुकाने हातात घेऊन पहिली. यावेळी सूरजने त्याचा गाजलेला झापुक झुपूक डायलॉगही अजितदादांना म्हणून दाखवल्यावर हा डायलॉग ऐकल्यावर अजित पवारही हसायला लागले.