भिवंडीत आज मोठा आगडोंब उसळला. येथील राहनाळ गावाजवळील एका फर्निचर गोदामाला भीषण आग लागली. ही आग इतकी भयंकर होती की आजूबाजूची १० ते १२ गोदामे जळून खाक झाली, अशी प्राथमिक माहिती समोर आली आहे.

फर्निचर गोदामाला लागलेली आग वेगाने पसरली. परिसरात आगीच्या ज्वाळा आणि धुराचे लोट पसरले होते. संपूर्ण परिसर धुराने काळवंडला होता. काही वेळातच आगीनं आजूबाजूची १० ते १२ गोदामे कवेत घेतली. त्यात ती जळून खाक झाली, अशी माहिती देण्यात आली. खबरदारी म्हणून परिसरातील नागरिकांना सुरक्षित ठिकाणी हलवण्यात आले आहे. या गोदामांमध्ये ठेवलेल्या फर्निचरचा कोळसा झाला. घटनेची माहिती मिळाल्यानंतर तात्काळ अग्निशमन दलाची चार ते पाच वाहने तिथे पोहोचली. आगीवर नियंत्रण मिळवण्यासाठी शर्थीचे प्रयत्न सुरू केले.