भंडारा जिल्ह्यात दोन दिवसापासून मुसळधार पाऊस सुरु आहे. यामुळे नदी-नाल्यांना पूर येण्याची स्थिती निर्माण झाली असून, तुमसर तालुक्यातील तामसवाडी ते सीतेपार गावांना जोडणाऱ्या पुलावरून पावसाचे पाणी वाहू लागले आहे. या परिस्थितीमुळे खबरदारीचा उपाय म्हणून प्रशासनाने या मार्गावरील वाहतूक तात्पुरती बंद केली आहे.

नदीपात्रातील पाणी पातळी झपाट्याने वाढत असल्याने नदीकाठच्या गावांना सतर्कतेचा इशारा प्रशासनाने दिला आहे. नागरिकांनी आवश्यकता नसताना घराबाहेर पडू नये, असं आवाहनही करण्यात आलं आहे.आपत्ती व्यवस्थापन पथक सतर्क असून, संबंधित यंत्रणांना अलर्ट ठेवण्यात आलं आहे. दरम्यान, अजून काही दिवस पावसाचा जोर असाच कायम राहण्याची शक्यता हवामान विभागाने व्यक्त केली आहे.