भंडारा जिल्ह्यात गेल्या दोन दिवसांपासून सुरू असलेल्या मुसळधार पावसामुळे जनजीवन विस्कळीत झालं आहे. आज हवामान विभागानं जिल्ह्यासाठी 'रेड अलर्ट' जारी केला आहे. या पार्श्वभूमीवर खबरदारीचा उपाय म्हणून जिल्हाधिकाऱ्यांनी जिल्ह्यातील सर्व शासकीय, खासगी शाळा, अंगणवाड्या तसेच महाविद्यालयांना सुट्टी जाहीर केली आहे. पावसाच्या जोरदार सरींमुळे अनेक भागांत पाणी साचले आहे. हवामान विभागानुसार पुढील २४ ते ४८ तास भंडारा जिल्ह्यासाठी अत्यंत संवेदनशील असून, मुसळधार ते अतिमुसळधार पावसाची शक्यता वर्तवण्यात येत आहे. त्यामुळे नागरिकांनी आवश्यक तेव्हाच घराबाहेर पडावं, असे आवाहनही प्रशासनाकडून करण्यात आलं आहे.