बीडमधील सरपंच संतोष देशमुख हत्या प्रकरणात मोठी अपडेट समोर आली आहे. खंडणी प्रकरणातील आरोपी वाल्मिक कराड याचे ३ मोबाईल सीआयडीने जप्त केले आहेत. या मोबाईलची फॉरेन्सिक तपासणी केली जाणार आहे.

बीड जिल्ह्यातील केजच्या मस्साजोग येथील माजी सरपंच संतोष देशमुख हत्या प्रकरणातील तपासाला आता वेग आला आहे. वाल्मिक कराड याने सरेंडर केल्यानंतर उर्वरित आरोपींना देखील पोलिसांनी बेड्या ठोकल्या आहेत. हत्येला एक महिना पूर्ण झाला आहे. आरोपी वाल्मिक कराडचे ३ मोबाईल सीआयडीने जप्त केले असून त्यांची फॉरेन्सिक तपासणी केली जाणार आहे. त्यासाठी आज सीआयडीकडून कराडच्या आवाजाचे नमुने घेतले जाण्याची शक्यता आहे. दरम्यान, अद्यापही विष्णु चाटे याचा मोबाईल तपास पथकाला सापडलेला नाही आहे. त्याच्या मोबाईलचा शोध सध्या पोलिसांकडून सुरू आहे. त्याचा मोबाईल सापडेपर्यंत वाल्मिक कराड हा फोनवरून खंडणीसाठी बोलल्याचं स्पष्ट होणार असल्याचं सांगण्यात येत आहे. मात्र जोपर्यंत या दोघांचे मोबाईल हातात येत नाही तोवर या संपूर्ण प्रकरणाचे धागेदोरे लागणार नसल्याचं समजत आहे.