खंडणी प्रकरणातील आरोपी वाल्मिक कराड याला १४ दिवसांची न्यायालयीन कोठडी सुनावण्यात आलेली आहे. आज व्हिडिओ कॉन्फरन्सींगद्वारे कराड याला बीड न्यायालयासमोर हजार करण्यात आलं होतं. त्यानंतर त्याला १४ दिवसांची न्यायालयीन कोठडी सुनावण्यात आली आहे.

बीडचे माजी सरपंच संतोष देशमुख हत्या प्रकरणात खंडणीचा आरोप असलेल्या वाल्मिक कराड याच्यावर मकोका अंतर्गत गुन्हा दाखल आहे. चौकशीसाठी तो सध्या कोठडीत आहे. यापूर्वी देखील त्याला खंडणी प्रकरणात १४ दिवसांची न्यायालयीन कोठडी देण्यात आलेली आहे. मात्र मकोका अंतर्गत दाखल गुन्ह्यात दिलेली ७ दिवसांची एसआयटी, सीआयडी कोठडी आज संपल्यानंतर बीड न्यायालयासमोर त्याला व्हिडिओ कॉन्फरन्सींगद्वारे हजार केलं होतं. यात तपास अधिकाऱ्यांनी स्वत: न्यायालयीन कोठडीची मागणी न्यायालयाकडे केली. त्यानंतर ही मागणी मान्य करत कोर्टाने १४ दिवसांची न्यायालयीन कोठडी वाल्मिक कराड याला सुनावली आहे.