अजित पवार मंत्री धनंजय मुंडे यांचा राजीनामा घेतील अशी प्रतिक्रिया राष्ट्रवादी कॉंग्रेस शरदचंद्र पवार पक्षाचे संदीप क्षीरसागर यांनी दिली आहे. सरपंच संतोष देशमुख हत्या प्रकरणावरून मंत्री धनंजय मुंडे यांचा राजीनामा घेतला जावा या मागणीसाठी विरोधक आक्रमक झालेले आहेत.

बीडच्या मस्साजोगचे माजी सरपंच संतोष देशमुख हत्येत खंडणी प्रकरणातील आरोपी असलेला वाल्मिक कराड हा मंत्री धनंजय मुंडे यांचा विश्वासू आहे. याबद्दल स्वत: धनंजय मुंडे आणि पंकजा मुंडे यांनी भाष्य केलेलं आहे. त्यामुळे हत्या प्रकरणाला राजकीय वळण लागलेलं आहे. त्यानंतर धनंजय मुंडे यांनी राजीनामा द्यावा अशी मागणी मस्साजोगच्या ग्रामस्थांसह विरोधकांकडून केली जात आहे. आज याबद्दल निर्णय होणार असल्याने त्यावरच आता शरद पवार गटाचे नेते संदीप क्षीरसागर यांनी प्रतिक्रिया दिली असून अजित पवार धनंजय मुंडे यांचा राजीनामा घेतील असं त्यांनी म्हटलं आहे. जोवर या प्रकरणात आरोपी फासावर चढत नाही, त्यांना शिक्षा होत नाही मुंडे यांनी आपल्या पदाचा राजीनामा द्यावा. आम्हाला खात्री आहे की अजित पवार नक्कीच याबद्दल योग्य निर्णय घेतील, असं त्यांनी म्हटलं आहे.