बीडमधील माजी सरपंच हत्या प्रकरणाच्या तपासाला आता वेग आला आहे. आता सरपंच देशमुख यांच्या भावाला चौकशीसाठी बोलावण्यात आलं आहे. सीआयडीकडून संतोष देशमुख यांच्या भावाची आता चौकशी होत आहे.

बीड जिल्ह्यातील केजच्या मस्साजोग येथील माजी सरपंच असलेले संतोष देशमुख यांची 20 दिवसांपूर्वी अपहरण करून हत्या करण्यात आली होती. त्यानंतर या घटनेचा सर्व स्तरांतून निषेध व्यक्त करण्यात येत आहे. तसंच या प्रकरणातील चौघा आरोपींना अटक करून शिक्षा देण्याची मागणी आता जोर धरत आहे. त्यासाठी राज्यभरातून निषेध मोर्चे देखील काढण्यात येत आहेत. तर विरोधकांकडून सत्ताधाऱ्यांवर टीका केली जात आहे. तसंच या प्रकरणात मंत्री धनंजय मुंडे यांचे विश्वासू समजले जाणारे वाल्मिक कराड यांचं देखील नाव पुढे आलेलं असल्याने सत्ताधारी पक्ष या प्रकरणात तपास करत नसल्याचं देखील विरोधकांचं म्हणण आहे. त्यानंतर मुख्यमंत्री देवेंद्र फडणवीस यांनी या प्रकरणाच्या तपासासाठी स्पेशल एसआयटी नेमल्यानंतर आता या प्रकरणाच्या तपासाला वेग आलेला दिसत आहे. याच अनुषंगाने आज सीआयडीचे पथक आणि पथकाचे प्रमुख सचिन पाटील बीडमध्ये दाखल झाले आहेत. त्यानंतर त्यांनी संतोष देशमुख यांचे भाऊ धनंजय देशमुख यांना देखील बीडच्या शहर पोलीस ठाण्यात चौकशीसाठी बोलावलं असल्याचं सांगण्यात येत आहे.

दरम्यान, याबद्दल बोलताना, मी स्वत:च पोलीसांना भेटायला आलो असल्याचं देशमुख यांच्या भावाने सांगितलं असलं तरी सीआयडीच्या पथकाकडून त्यांची काय चौकशी होणार याकडे सगळ्यांचं लक्ष लागलं आहे. मात्र या प्रकरणाला आलेल्या वेगामुळे पोलीसांच्या हाती काही धागेदोरे लागले असण्याची शक्यता आहे.