बीड पोलिसांनी आज सतीश भोसले उर्फ खोक्याला शिरूर न्यायालयासमोर हजर केले होते. न्यायालयाने त्याला सात दिवसांची पोलीस कोठडी सुनावली आहे. त्याला पोलिसांनी प्रयागराज येथून अटक केली होती.

दिलीप आणि महेश ढाकणे या पितापुत्रांना सतीश भोसलेने मारहाण केली होती. त्याने बॅटने महेश ढाकणेला अमानुष मारहाण केली होती. त्यानंतर त्याचे अनेक व्हिडीओ समोर आले होते. व्हायरल व्हिडीओमुळे हे प्रकरण तापले. पुढे पोलिसांनी सतीश भोसलेचा शोध घ्यायला सुरुवात केली. याच दरम्यान सतीश भोसले फरार झाला. त्याला प्रयागराज येथून अटक करण्यात आली. शिरूर पोलिसांनी त्याचा मोबाईल जप्त केला आहे. जिल्हा रुग्णालयात त्याची वैद्यकीय तपासणी देखील झाली आहे. काल त्याला प्रयागराजहून छत्रपती संभाजीनगरला आणण्यात आले. पुढे त्याची रवानगी बीडला करण्यात आली. आज त्याला न्यायालयात हजर करण्यात आले. न्यायालयाने सतीश भोसलेला ७ दिवसांची पोलीस कोठडी सुनावली आहे.