बीड जिल्ह्यातील मस्साजोग येथील माजी सरपंच संतोष देशमुख हत्या प्रकरणात आता खंडणी प्रकरणातील आरोपी वाल्मिक कराड याचे फास आवळले जाण्याची शक्यता आहे. यासाठी सोमवारी सीआयडीने एक महत्वाचं पाऊल उचललं आहे. वाल्मिक कराड याच्या आवाजाचे नमुने सोमवारी सीआयडीने घेतले आहेत.

माजी सरपंच संतोष देशमुख हत्या प्रकरणात आरोपी वाल्मिक कराड याने पुण्यात सीआयडीला सरेंडर केल्यानंतर या प्रकरणाच्या तपासाला वेग आला आहे. वाल्मिक कराड याचे ३ मोबाईल पोलिसांनी यापूर्वी तब्यात घेतले होते. त्यातून बरीच महत्वाची माहिती मिळण्याची शक्यता आहे. त्यासाठी पोलिसांनी काल कराड याच्या आवाजाचे नमुने देखील घेतले आहेत. पुढील तपासासाठी हा नमूना महत्वाचा ठरणार आहे. इतकंच नाही तर विष्णु चाटे याच्या देखील आवाजाचा नमूना घेण्यात आलेला आहे.

दरम्यान, वाल्मिक कराड याची कोठडी आज संपत असून त्याला आज कोर्टात हजर केलं जाणार आहे. यावेळी सीआयडीकडून त्याच्या वाढीव कोठडीची मागणी केली जाणार आहे.