तेजस्वी घोसाळकर यांनी भाजपमध्ये प्रवेश केल्यानंतर त्यांच्या रॅलीत चक्क बाळासाहेब ठाकरे यांच्या नावाच्या घोषणा देण्यात आल्या आहेत. 'बाळासाहेब ठाकरे यांचा जय हो, हर हर महादेव' अशा घोषणांनी परिसर दणाणून गेला. तेजस्वी घोसाळकर या दिवंगत अभिषेक घोसाळकर यांच्या पत्नी असून त्यांनी नुकताच ठाकरे गटातून भाजपमध्ये प्रवेश केला आहे. भाजपच्या रॅलीत शिवसेनेचे संस्थापक बाळासाहेब ठाकरे यांचा जयघोष झाल्याने राजकीय वर्तुळात चर्चांना उधाण आले आहे. तसेच त्यांच्या प्रचार फलकामध्ये त्यांचे पती अभिषेक घोसाळकर यांचे फोटो वापरल्याने खासदार संजय राऊत यांनी टीका देखील केली होती. तेजस्वी यांनी आपल्या रॅलीमध्ये अमित शाह आणि मोदी यांचे फोटो वापरावे असे म्हणत त्यांनी संजय राऊत यांनी हल्लाबोल केला होता. अशातच आज बाळासाहेब ठाकरे यांच्या नावाच्या घोषणा दिल्याने ठाकरे गटातून काय प्रतिक्रिया येतात हे पाहणे महत्वाचे ठरणार आहे.