बदलापूर पूर्वेकडील नामांकित शाळेतील दोन मुलींवर अत्याचार झाल्याची संतापजनक घटना घडली. या घटनेनंतर राज्यभरात चीड व्यक्त होत आहे. शाळेतील सफाई कर्मचाऱ्याने अत्याचार केल्याची माहिती समोर आली आहे. या घटनेच्या निषेधार्थ आज बदलापूरमध्ये तीव्र आंदोलन करण्यात येत आहे. आज, मंगळवारी सकाळी शाळेसमोर सर्व विद्यार्थ्यांच्या पालकांनी आंदोलन केले. आरोपीला फासावर लटकवा, अशी मागणी पालकांकडून होत आहे. शाळा प्रशासन आणि पोलिसांवरही हलगर्जीपणाचा आरोप पालकांनी केला आहे.

सकाळी शाळेसमोर सुरू झालेल्या आंदोलनाचे लोण हळूहळू संपूर्ण बदलापुरात पसरले. काही वेळाने बदलापूरमधील नागरिकांनी रेल्वे स्थानकात आंदोलन केले. बदलापूरमधील नागरिक थेट रल्वे रुळांवर उतरले. त्यामुळे रेल्वेसेवा ठप्प झाली आहे.