बदलापूर रेल्वे स्थानकावरील स्कायवॉकवर एका महिलेला मारहाण झाल्याची अत्यंत संतापजनक घटना घडली आहे. त्याचा व्हिडिओ 'साम टीव्ही'च्या हाती लागला आहे. एका सजग नागरिकानं मोबाइलमध्ये हा व्हिडिओ शूट केला आहे. या घटनेमुळं रेल्वे स्थानक परिसरातील सुरक्षेचा प्रश्न पुन्हा एकदा ऐरणीवर आला आहे.

बदलापूर पश्चिमेकडील स्कायवॉकवर एक व्यक्ती महिलेला बेदम मारहाण करताना या व्हिडिओत दिसत आहे. त्याच परिसरात राहणाऱ्या एका रहिवाशाने आपल्या मोबाइलमध्ये हा प्रकार चित्रित केला. हा व्हिडिओ आता व्हायरल होत आहे. दररोज लाखो प्रवाशांची वर्दळ असणारं बदलापूर स्थानक आणि स्कायवॉकवर सुरक्षेची कोणतीही ठोस यंत्रणा दिसून येत नसल्यानं प्रवाशांमध्ये भीतीचं वातावरण आहे. अशा प्रकारच्या घटना वारंवार घडत असल्याचा आरोप नागरिकांनी केला आहे. महिलेला मारहाण करणारा हा तरूण कोण? त्यानं तिला मारहाण का केली असावी, असे प्रश्न उपस्थित होत आहेत.