मुंबई : बदलापूरमध्ये दोन तासांपासून रेल रोको सुरू आहे. शाळकरी मुलींवर झालेल्या अत्याचार प्रकरणी पालकांचा उद्रेक पाहायला मिळत आहे. पोलीस पालकांना समजावून सांगण्याचा प्रयत्न करत आहेत. परंतु आंदोलकांनी आक्रमक पवित्रा घेतलाय. बदलापूरमध्ये मोठ्या संख्येने पालक रस्त्यावर उतरल्याचं दिसत आहे. बदलापूरमध्ये चार वर्षाच्या दोन चिमुकल्यांवर अत्याचार झाला होता, याविरोधात आता संतापाची लाट शहरात उठली आहे.

शाळेत चिमुकल्यांवर झालेल्या अत्याचार प्रकरणी संतप्त बदलापूरकरांचं गेल्या दोन तासांपासून आंदोलन सुरू आहे. बदलापूर बंदची हाक देण्यात आलीय. दोषींना फाशी द्या, अशी मागणी आंदोलक बदलापूरमध्ये करत आहे. बदलापूर रेल्वे स्थानकावर हजारो बदलापूरकर एकवटले आहेत. आरोपीला तात्काळ अटक करा कठोर शिक्षा द्या, अशी मागणी केली जातेय. उड्डाणपुलावरील वाहतूक बंद पाडण्यात आलीय. एका सफाई कामगाराने शाळेतच्या चार वर्षाच्या चिमुकल्या मुलींवर अत्याचार झाल्याची घटना घडली होती.