बदलापूरमध्ये ऑगस्ट २०२४ मध्ये एका शाळेतील दोन मुलींवरील अत्याचाराची घटना उघडकीस आली होती. त्यानंतर बदलापूरसह संपूर्ण महाराष्ट्रात संतापाची लाट उसळली होती. या घटनेनंतर बदलापूरमध्ये मुलींच्या सुरक्षिततेचा प्रश्न निर्माण झाला होता. त्यात आता पुन्हा शाळेतील ४ वर्षांच्या बालिकेवर अत्याचाराची घटना उघडकीस आली आहे. शाळेत ने-आण करणाऱ्या व्हॅनचालकानं बालिकेवर अत्याचार केल्याचा आरोप आहे. या घटनेनंतर बदलापूरवासियांमध्ये संतापाची लाट उसळली आहे. पोलिसांनी तात्काळ संशयित आरोपीला अटक केली.

या आरोपीला कल्याण सत्र न्यायालयात हजर करण्यात आले. यावर सुनावणी होऊन न्यायालयाने आरोपीला २७ जानेवारीपर्यंत म्हणजेच तीन दिवसांची पोलीस कोठडी सुनावली आहे.

कसं उघडकीस आलं हे प्रकरण?

पीडित बालिका ही एका शाळेत शिकतेय. ती एका स्कूलव्हॅनमधून दररोज शाळेत ये-जा करायची. ज्या व्हॅनमधून ती शाळेत जायची, त्या व्हॅनच्या चालकाने तिच्यावर अतिप्रसंग करण्याचा प्रयत्न केला. मुलगी घरी आल्यानंतर तिने घडलेला प्रकार पालकांना सांगितला. ते ऐकून पालकांना धक्काच बसला. त्यांनी तात्काळ बदलापूर पोलीस ठाणे गाठून तक्रार दाखल केली.