छत्रपती संभाजी नगर जिल्ह्यातील औरंगाबाद पश्चिम मतदार संघात मतदारांना पैसे वाटत असल्याचा व्हिडिओ व्हायरल झालाय. छत्रपती संभाजीनगरच्या इंदिरा नगर भागातील एक घटना समोर आली आहे. पैसे वाटताना मतदारांच्या बोटाला शाई लावली गेल्याचं या व्हिडिओमध्ये दिसत आहे. औरंगाबाद पश्चिम मतदार संघात लोकांनी मतदान करू नये म्हणून त्यांच्याकडील मतदान कार्ड जमा केले जात आहे. आणि त्यांना 1500 रुपये दिले जात आहेत. दरम्यान मतदानकार्ड जमा करून 1500 रुपये देणाऱ्या व्यक्तीला पकडण्यात आल्याची माहिती समोर आलीय. आपल्याला मत देणार नाहीत, अशा लोकांनी मतदान करू नये म्हणून दीड हजार रुपये देऊन मतदानकार्ड जमा केली जात असल्याचा आरोप ठाकरे गटाकडून करण्यात आलाय. तसेच आतापर्यंत तब्बल पाच हजार मतदानकार्ड जमा केल्याचा दावा देखील करण्यात आलाय. याप्रकरणी छत्रपती संभाजीनगरच्या जवाहर नगर पोलीस ठाण्यात सदरील व्यक्तीची चौकशी सुरू आहे.