मंत्री आशिष शेलार यांनी आगामी मुंबई महानगरपालिका निवडणुकीच्या पार्श्वभूमीवर उद्धव ठाकरेंना थेट आव्हान दिले आहे. महायुतीचा महापौर हा मराठीच असेल, त्याबद्दल शंका घेण्याचे कारण नाही असा दावा शेलार यांनी केला आहे. तसेच, तुमचा महापौर कुठल्या गल्लीतून आणि मोहल्ल्यातून येणार, हे आधी जाहीर करा, असा खोचक सवालही त्यांनी ठाकरेंना विचारला आहे. संजय राऊत आणि अनिल परब यांनी राज ठाकरे यांची भेट घेतल्याच्या पार्श्वभूमीवर शेलार यांनी ही टीका केली. गेल्या २५ वर्षांत मुंबईत भ्रष्टाचार करणाऱ्यांना पराभूत करण्यासाठी १५ तारखेचा मुहूर्त ठरल्याचेही त्यांनी बोलताना स्पष्ट केले.