आषाढी एकादशीनिमित्त पंढरपुरात लाखो वारकरी दाखल झाले आहेत. विठुरायाच्या दर्शनासाठी देशाच्या कानाकोपऱ्यातून आलेले भाविक मोठ्या श्रद्धेने रांगेत उभे आहेत. विशेषत: पदस्पर्श दर्शनासाठी प्रचंड गर्दी झाल्याचे दिसून येत आहे. पदस्पर्श दर्शनाची रांग थेट गोपाळपूरपर्यंत, म्हणजेच मंदिरापासून जवळपास ५ किमी अंतरापर्यंत पोहोचली आहे.

आषाढी वारीच्या पार्श्वभूमीवर व्हीआयपी दर्शन व्यवस्था बंद ठेवण्यात आली असून, त्यामुळे सामान्य भाविकांना थेट पदस्पर्श दर्शनाची संधी मिळत आहे.भाविकांचे "ज्ञानोबा-तुकोबा"च्या जयघोषात संपूर्ण पंढरपूर दुमदुमलं आहे. चंद्रभागेच्या तीरावर भक्तीचा महासागर ओसंडून वाहताना दिसतो आहे. प्रशासनाकडून भाविकांसाठी आवश्यक सोयी-सुविधांची व्यवस्था करण्यात आली आहे.