नीट (NEET) पेपरफुटीच्या वादळानंतर आता देशात E20 पेट्रोलच्या मुद्द्यावरून नवे राजकीय युद्ध पेटण्याची शक्यता आहे. आम आदमी पार्टीचे प्रमुख अरविंद केजरीवाल यांनी E20 पेट्रोलविरोधात थेट पंतप्रधान निवासस्थानावर मार्च काढण्याची घोषणा केली आहे.

या आंदोलनादरम्यान केजरीवाल तब्बल २ लाख नागरिकांच्या ऑनलाइन स्वाक्षऱ्यांचे निवेदन पंतप्रधान नरेंद्र मोदी यांना सोपवणार आहेत. आपल्या शंभर प्रमुख समर्थकांसह आपण स्वतः पंतप्रधानांच्या भेटीसाठी निघणार असल्याचे केजरीवालांनी स्पष्ट केले आहे. E20 इंधनामुळे वाहनांचे होणारे नुकसान आणि सामान्य जनतेवर पडणारा आर्थिक भार याविरोधात हा मोर्चा काढला जात आहे. NEET प्रकरणापाठोपाठ आता या मुद्द्यावरूनही केंद्र सरकारची कोंडी करण्याचा 'आप'चा प्रयत्न असून, आगामी काळात हा वाद अधिक पेटण्याची चिन्हे आहेत.