रुपेश पाटील, डहाणू

पालघर जिल्ह्यातील डहाणूमधील इराणी नगर परिसरात न्यू लक्ष्मी ज्वेलर्सवर दिवसाढवळ्या दरोडा घातल्याची घटना घडलीय. तिघे जण हातात शस्त्रे घेऊन आले होते. ते थेट न्यू लक्ष्मी ज्वेलर्समध्ये घुसले. त्यांच्या हातात बंदुका होत्या. भरदिवसा दरोडा टाकल्यानं डहाणूसह परिसरातील सराफा व्यावसायिकांमध्ये भीतीचे वातावरण आहे.

तिघे दरोडेखोर भरदिवसा हातात बंदुकांसह शस्त्रे घेऊन ज्वेलर्समध्ये घुसले. त्यांनी लाखो रुपये किंमतीचा सोन्या-चांदीचा ऐवज लुटून घटनास्थळावरून पोबारा केला. ही सर्व घटना सीसीटीव्ही कॅमेऱ्यात कैद झाली. या घटनेची माहिती मिळताच, पोलीस त्या ठिकाणी पोहोचले. डहाणू पोलीस आणि पालघरच्या स्थानिक गुन्हे शाखेकडून या घटनेचा पुढील तपास सुरू आहे.