मुंबईतील दादर-माहीम मतदारसंघात हायव्होल्टेज लढत होत आहे. मनसेचे युवा नेते अमित ठाकरे, शिंदे गटाचे सदा सरवणकर आणि ठाकरे गटाचे महेश सावंत हे निवडणूक रिंगणात आहेत. निवडणुकीसाठी आज मतदान होत असताना, वरळीत शिंदे आणि मनसेच्या कार्यकर्त्यांमध्ये राडा पाहायला मिळाला. पण माहीमच्या आखाड्यात उतरलेले उमेदवार अमित ठाकरे आणि शिंदे गटाचे उमेदवार सदा सरवणकर यांच्यातल्या संवादाचं वेगळंच चित्र पाहायला मिळालं.

या मतदारसंघात दुर्मिळ असं चित्र पाहायला मिळालं. ठाकरे आणि सरवणकर हे मतदानाच्या दिवशीच सिद्धिविनायकाच्या दर्शनासाठी गेले होते. त्याचवेळी हे दोघे विरोधी उमेदवार समोरासमोर आले होते. दोघांनीही एकमेकांना शुभेच्छा दिल्या. यावेळी सरवणकरांनी घातलेल्या जॅकेटवर धनुष्यबाणाचं चिन्ह उलटं झाल्याचं अमित ठाकरेंच्या लक्षात आलं. त्यांनी लगेच त्या जॅकेटवरचा धनुष्यबाण सुलटा करून दिला.

यावेळी अमित ठाकरेंनी प्रतिक्रिया दिली आहे. अनेक लोक भेटत आहेत. शुभेच्छा देत आहेत. खूपच चांगला प्रतिसाद आहे. वारं बदलतंय. पहिल्यांदाच निवडणुकीला उभं राहिलोय. उत्तम प्रतिसाद मिळतोय, असं अमित ठाकरे म्हणाले.