विधानपरिषदेच्या निवडणुका तोंडावर असतानाच ठाकरेसेनेचे आमदार अंबादास दानवे यांनी केलेल्या विधानामुळे राज्याच्या राजकारणात नव्या चर्चांना उधाण आलं आहे. दोन्ही शिवसेना पुन्हा एकत्र यायला हव्यात, अशी इच्छा दानवे यांनी व्यक्त केली आहे.

त्यांच्या या वक्तव्यामुळे राजकीय समीकरणांबाबत तर्क-वितर्कांना सुरुवात झाली असून, आगामी निवडणुकांच्या पार्श्वभूमीवर या विधानाकडे विशेष लक्ष दिलं जात आहे. सध्या राज्यात ठाकरे गट आणि शिंदे गट अशा दोन शिवसेना आहेत. हे प्रकरण सध्या सुप्रीम कोर्टात असून नेमकी शिवसेना कोणाची याचा निकाल अजूनही लागला नाहीये. निवडणूक आयोगाने धनुष्यबाण चिन्ह एकनाथ शिंदे यांना दिले आहे तर उद्धव ठाकरे यांच्या शिवसेनेचे चिन्ह मशाल आहे. अशा परिस्थितीत दानवे यांनी एकत्र येण्याबाबतची भूमिका मांडल्याने राजकीय घडामोडींना वेग आला आहे.